Tambal sa uti

Unsa ba ang UTI?

Ang UTI mao ang presensya sa impeksyon sa atong urinary tract system o ang agianan sa ihi. Lakip sa urinary tract system ang bladder o pantog kung diin magpondo ang ihi. Ang urethra sab ang ginaagian sa ihi pagawas sa lawas.

Ang nag-unang hinungdan sa UTI mao ang bakterya nga escherichia coli o mas nailhan nga “E. Coli" nga mosulod sa atong bladder o pantog ug urethra.

Mga simtomas sa UTI

Ang mga babaye ang kasagaran makasinati og UTI tungod kay ang ilang reproductive system kay duol sa agianan sa hugaw. Bisan og dili kaayo komon sa mga lalaki ang UTI, mas daghan ang kumplikasyon ang puwede nilang masinati.

Unsa ba gyud ang mga timailhan sa UTI? Basaha kini og pag-ayo aron mahibal-an kung kini mohaum sa ginabati:

• Kung makabati og kasakit inig ihi
• Sige og pangihi apan ginagmay ra
• Sakit inig higayon nga makighilawas
• Ang ihi hilabihan na ka-yellow o adunay bula
• Pagsakit sa ubos nga bahin sa likod
• Pagkahuyang o pagkaluya sa lawas
• Pagsakit sa ilawom sa gusok
• Angso og baho nga ihi
• Kung aduna na kini apil dugo o nana
• Adunay pagsuka o pagkalipong 
• Hilanat

Unsa ang hinungdan sa UTI?

• Diabetes
• Tumor sa urinary tract
• Ubang mga matang sa bakterya, sama sa Staphylococcus ug Chlamydia
• Paggamit og birth control pills
• Pagbuntis
• Dili makontrol ang pag-ihi o urinary incontinence
• Pakighilawas sa tawo nga adunay UTI o sa lain-lain mga tawo

Adunay ginatawag nga “secretion”mao nga mabalhin ang sakit

 Unsa ang mga pamaagi aron malikayan ang UTI?

• Likayi ang paglingkod sa hugaw nga kasilyas

Kini tungod paspas musaka ang mga bakterya sa atong pantog o bladder

• Pagsul-ob og gama sa cotton nga underwear

Ang pagsul-ob og hugot o nylon nga underwear hinungdan sa pagsingot nga hinungdan sab sa pagdaghan sa mga kagaw

• Ayaw pug-ngi ang pag ihi

Ang atong ihi adunay mikrobyo ug kung dili kini maipagawas kay magpundo sa atong pantog

• Likayo ang paggamit sa mga produkto nga adunay isog nga kemikal sama sa: 

• Feminine wash
• Synthetic nga napkin (Ginarekomenda ang pag gamit og tampon)
• Humot o Scented wipes

• Likayi ang pagkaon og mga parat

Ang pagkaon niini maoy hinungdan sa sakit sa bato nga maoy hinungdan nga lisod mangihi (sintomas sa UTI sa mga lalaki).

• Inom og mga diuretic sama sa buko juice o cranberry juice

Ang diuretic makatabang aron mahimong regular ang pag ihi. Pag-inom og unom ngadto sa walo ka baso nga juice o tubig matag adlaw. Ang kanunay nga pag-inom niini usa ka maayong pangontra sa UTI tungod kay makadagayday na og maayo ang atong ihi. 

• Trapuhan og maayo ang genital area o kinatawo human nga magpagawas og hugaw sa lawas

Ang sakto nga pagtrapo o pagpahid kay gikan sa atubangan padulong sa ilawom o likod. Importante kini ilabi na human og pagawas og hugaw sa lawas aron malikayan nga muadto ang bakterya sa urethra.

• Batasana ang pag ihi ug limpyohan dayon ang genital area paghuman og pakighilawas
• Regular nga magpa-ultrasound, PAP smear, ug urinalysis

Ang PAP smear o PAP test usa ka pamaagi sa doktor (gamit ang speculum) sa pagsusi sa vagina o cervix ug aron makakuha og cells ug mucus gikan sa cervix. Ang mga cells ug mucus nga makuha kay susihon aron mahibal-an kung kini kay normal.

Ang mga cells nga nakuha gikan sa PAP Test mahimong gamiton alang sa HPV Test o aron masayran kung ang tawo adunay human papillomavirus (HPV). Kini sab usa ka pamaagi aron mahibal-an kung ikaw adunay cervical cancer, genital warts, ug uban pang mga sakit sa genital area.

Ang urinalysis mao ang pagpa-diagnose pinaagi sa pag-tuki sa ihi aron mahibal-an kung ikaw adunay UTI o uban pang urinary infections.

Tambal sa UTI

Ang mosunod nga mga antibiotic kasagarang gigamit batok sa UTI. Importante: Batasana ang magpakonsulta sa doktor sa dili pa man muinom og bisan unsang tambal.

• Nitrofurantoin
• Sulfonamides
• Amoxicillin
• Cephalosporins
• Doxycycline
• Ciprofloxacin

Unsa ba ang mahitabo kung dili dayon matambalan ang UTI?

Kung ang usa ka UTI mapasagdan, kini mahimong moresulta sa lain-laing mga mas seryoso nga sakit. Kung ang impeksyon modaghan sa atong kidney o bato (kidney infection), kini mahimong mokaylap sa ubang mga organ sa atong lawas sama sa urethra (urethritis) ug bladder o pantog (cytitis).

Adunay higayon sab nga pabalik-balik ang UTI sa usa ka tawo.  Sa niining sitwasyona kung diin ka-tulo o ka-upat na nga higayon ka na-UTI, maayo nga magpa-Ultrasound ug CT scan aron masuta kung konektado ba kini sa laing sakit, ilabi na kung diabetic ang usa ka tawo, basig mas mukomplikado pa kini.