Lahi-lahi nga kasagarang hinungdan ug remedyo sa bloated stomach

Kung nakasinati ka og dili maayo nga ginabati sa tiyan, kasukaon, ug murag gikapoy ug huyang ang lawas, ang pag ilis sa naandan nga pamaagi sa pagkaon makatabang. Apan kung kini nga mga simtomas magbalik-balik bisan unsa pa nga klase sa pagkaon ang imong kan-on, puwede mahimong timailhan kini sa usa ka labi ka grabe nga sakit.

Kadaghanan sa mga ginabati nga bloated stomach kay makasinati og pagbutod ug paghuot sa usa ka parte sa tiyan ug dugang pa ang pagsinati og murag busog pirmi o walay gana mukaon. Sa pipila ka mga higayon sab, makapagawas sila og daghang dili maayo nga hangin sa lawas. Samtang adunay pipila ka mga tawo sab nga makasinati og sakit sa tiyan ug murag katulgon matag higayon nga makakaon og parat o mga pagkaon nga puno sa carbohydrates.

Ang pagkonsulta sa usa ka doktor mao ang kanunay nga labing maayong epektibo nga pamaagi aron mahibal-an ang hinungdan ug tambal sa sakit. Apan sa panahon karon nga pandemya, adunay pipila ka mga timailhan o sintomas nga mahimo nimong susihon kung dili ka makabisita sa usa ka espesyalista.

Posibleng hinungdan sa bloated stomach

Daghan ang posibleng hinungdan kung bation nimo ang pagbutod sa tiyan, mura ka’g kasukaon, ug murag gikapoy ang lawas. Ang uban niini mao ang mosunod:

1. Stress ug Anxiety

Ang pandemya nga COVID-19 dili lang usa ka hulga sa pisikal nga kahimsog, apan apil sab ang mental o pangisip. Ang stress ug kabalaka adunay dakong epekto sa digestive system tungod kay puwede kini magpahinay sa lihok sa tinai. Kining dili normal nga paglihok sa tinai mao ang usa sa mga nag-unang hinungdan kung ngano gibati nimo nga adunay kay bloated tummy, kasukaon, ug kaluya.

Matod pa sa mga eksperto, makaingon ka nga nakasinati ka og stress kung adunay kay gibati nga paggahi ug pagsakit sa imong kaunoran, gipanugnaw ug ginapaningot ang mga palad ug lapalapa, dili makatulog sa gabii ug kanunay nga ginadaman, ug kasagaran maigo og trangkaso o uban pang sakit.

Kung ikaw kay nakasinati og stress ug anxiety, makatabang ang kanunay nga pagginhawa og lawom giubanan og yoga ug meditation apil sab ang paghilot sa imong kaunoran o muscles. Ug tungod apektado ang imong mental nga kahimsog, maayo sab himuon ang pag ampo ug pagsulat sa journal bahin sa imong ginabati.

Importante nga mahatagan dayon og saktong tambal ang stress ug anxiety tungod kay puwede kining hinungdan sa constipation ug uban pang mga sakit sa tiyan.

2. Constipation

Kung ang usa ka tawo makabati nga murag bloated ug maglisod og pagawas sa iyang hugaw sa lawas dili sama sa iyang naandan,  o ang hugaw nga ginapagawas sa lawas kay gahi ug sakit nga adunay apil nga sakit sa tiyan, kini usa ka timailhan sa constipation. Daghan og hinungdan sa constipation apil na dinha ang dehydration, pagbuntis, kuwang og fiber sa lawas, pag-inom og tambal nga adunay side effect sa constipation, ug adunay kalit nga kausaban sa lifestyle ug diet.

Ang paghilis sa gikaon o laxatives maoy usa sa mga nag-unang ginareseta sa mga doktor aron matambalan ang constipation, apan puwede sab nimo nga sulayan usa nga usabon ang imong lifestyle o diet

3. Gastroparesis

Ang Gastroparesis o paralysis sa tiyan kay mahitabo kung ang tiyan dili makahilis sa pagkaon sa normal niining paagi. Kini maoy hinungdan sa pagsamok sa natural nga proseso mao nga moresulta sa pagbutod sa tiyan, pagkalipong ug kasukaon, paghuot ug pagsakit sa dughan, ug pagsuka. Kasagaran ang sakit nga mabati kay anaa sa parte sa lawas ubos sa gusok.

Tungod niini nga mga sakit nga kasagaran giubanan sa walay gana mukaon, puwedeng hinungdan sa kakapoy, pag ubos sa timbang tungod sa kakulangan sa sustansya. 

Matambalan ang gastroparesis pinaagi sa pag kaon og insakto sa mga masustansya nga pagkaon. Ang mga pagkaon nga sustansyado ug puno sa fiber dugay kini matunaw sa tiyan, mao nga ginatambag sa mga doktor isip tambal sa bloated stomach kay ang pagkaon ug soft food sama sa sabaw, nilaga, ug mga nutritional drinks.

4. Irritable bowel syndrome (IBS)

Matod pa sa mga eksperto, kini nga mga grupo sa simtomas nga muagi sa gastrointestinal tract ug lakip niini kay ang pagsakit sa tiyan giubanan og constipation ug kalibanga, pagtapok sa mga white mucus sa hugaw nga ginagawas sa tawo, ug pagsakit sa tiyan tungod sa paghubag niini.

5. Small intestinal bacterial overgrowth (SIBO)

Kung makasinati ka ug bloated ug puno og hangin sa tiyan, kalibanga o constipation, pag sakit sa tiyan, kasukaon, ug kakapoy, posible nga aduna kay SIBO. Kini ang hinungdan sa hinay nga paglihok sa gamay nga tinai mao nga dili maduso og tarong ang pagkaon sa digestive tract.

Ang tambal niini magdepende sa matang sa SIBO apan kasagaran nga ginareseta sa doktor sa pasyente kay usa ka klase o kombinasyon sa mga antibiotics. Makaayo sab sa ginabati ang low FODMAP (fermentable oligosaccharides, disaccharides, monosaccharides, ug polyols) diet tungod kay kini mga compounds nga ginaproseso sa bakterya nga usahay hinungdan sa mga sintomas sa SIBO.

Mga pamaagi aron malikayan ang bloated stomach

Sa mga higayon nga dili kaayo grabe ug temporaryo lang nga makabati og bloated belly, pagkalipong ug kasukaon, ug kakapoy sa lawas, puwede kining maremedyohan pinaagi sa hustong pagpahulay, pag-inom ug tambal alang sa bowel movement o pagpagawa sa dili maayo nga hangin sa lawas.

Pipila sa mga remedyo nga pwedeng himuon sa panimalay aron matambalan ang sakit sa tiyan mao ang:

• Kunhoran ang pagkaon og processed foods nga kasagaran kay puno sa tambok ug parat
• Menosan ang stress o anxiety
• Pagkunhod o pag-undang og sigarilyo ug pag-inom og ilimnon nga makahubog
• Pag kaon og ginagmay nga konsumo sa pagkaon pag abot sa paniudto ug panihapon
• Usapa og maayo ug hinay-hinay ang pagkaon
• Regular nga pag inom sa sakto nga kadaghanon sa tubig sa tibuok adlaw

Unsaon nimo pagkahibalo nga angay na magpatan-aw o check-up sa doktot?

• Kung ang mga sintomas sa bloated stomach kay milungtad na sa duha ka semana o labaw pa
• Dili mahibal-an ang rason sa pagubos sa timbang
• Abnormal nga kolor ug dili kanunay nga pagpagawas ng hugaw sa lawas 
• Mawad-an na og gana sa pag kaon og paspas nga makabati og kabusog
• Grabe nga kasakit sa tiyan
• Adunay dugo sa ihi ug stool

Daghan og hinungdan sa bloated stomach. Dakong hinungdan ang klase ug kadaghanon sa pagkaon nga atong ginakunsumo sa kinatibuk-ang kahimsog sa tiyan, busa mas labing maayo nga mukaon og masustansya nga pagkaon ug batasanon ang pag-uban niini og healthy lifestyle aron malikayan nga musamot ang ginabati nga pagsakit sa tiyan.