Sakto nga pag atiman sa bata nga bag-ong tuli

Sagad sa mga lalaki muagi sa tuli o circumcision kung diin ginatanggal sa doktor ang panit na nagputos sa ubos nga bahin sa kinatawo sa lalaki. Sa Pilipinas, sagad kining ginabuhat sa mga bata nga lalaki isip timaan sa ilang pagsulod sa puberty stage.

Unsa ang importansya sa pagpatuli?

Gawas sa nahimo na kining tradisyon, ang pagpatuli sab adunay daghang benepisyo sa panglawas. Pipila niini mao ang mga musunod:

• Para sa Kalimpyo sa Kaugalingon

Mas dali limpyohan ang kinatawo sa lalaki nga niagi na og pagpatuli tungod natanggal na ang panit na posibleng mahimong sagabal sa pagpalimpyo niini.

• Para makalikay sa UTI o Urinary Tract Infection

Mas ubos ang chance na magka impeksyon sa pag-ihi ang bata nga lalaki na niagi na og pagpatuli. Ang panit na wala natanggal sa mga wala miagi og pagpatuli posible nga mahimong tinubdan sa bacteria na hinungdan sab sa Urinary Tract Infection o UTI.

• Aron makalikay sa lain-laing problema ug sakit inig katigulang

Ang dili pagpatuli posibleng mahimong hinungdan sa problema sama sa balanitis o ang pagpanghubag sa ubos nga bahin sa kinatawo sa lalaki. Posible sab kini mahimong hinungdan sa Phimosis o Paraphimosis nga kondisyon kung diin dili na malihok ang panit sa kinatawo sa lalaki. Sumala sab sa pagtuon, dako sab ang tiyansa na magka sexually transmitted diseases ug erectile dysfunction  ang mga lalaki nga wala miagi og pagpatuli.

Asa mamahimong magpatuli ang mga bata nga lalaki?

Tungod sa importansya sa pagpatuli sa panglawas, importante nga muagi ang inyong anak sa maong operasyon pinaagi sa mga lisensyado nga doktor sa mga ospital aron malikayan ang lain-laing komplikasyon na posibleng hinungdan sa mali nga pagtuli. Kung kulang ang budget, mamahimong dalaon ang inyong anak sa mga health centers na nagahatag og libreng tuli matag summer.

Unsaon pag atiman sa inyong anak paghuman og pagpatuli?

Dili lalim ang sakit na dala sa pagpatuli maong kinahanglan atimanon ug tabangan ang anak na miagi sa tuli aron dili kini magka-komplikasyon o impeksyon. Ania ang pipila ka tips para sa sakto nga pag atiman sa bata nga bag-ong tuli:

• Bantayan ang pagdugo ug impeksyon

Normal lang ang pagdugo sa kinatawo sa lalaki paghuman og tuli. Hinuon, kung mapansin na sobra na ang pagdugo niini, mamahimong mokonsulta sa doktor para makasigurado. Kung aduna sab nana, nagkagrabe nga paghubag ug kalintura, mas maayo sab na iduol na kini sa doktor aron malikayan ang komplikasyon. 

• Ampingan ang samad samtang nagaligo

Mas maayo nga likayan ang pagligo sa tibuok lawas sa mga unang adlaw human sa pagpatuli. Gani, ginarekomenda nga mag sponge bath na lang. Paghuman sa 5-7 ka adlaw, mamahimo na nga mubalik sa normal na paagi sa pagligo apan likayan lang ang pag-rub sa infected area.

• Limpyohan ug ampingan ang samad

Mamahimong tanggalon ang bandage na nakabutang sa samad paghuman sa 2 ka adlaw human sa operasyon. Siguraduhon na limpyo ang kamot ayha hilabtan ang samad ug butangan kini og petroleum jelly aron malikayan ang pagkiskis niini sa sanina. Likayan sab ang pagsuot og mga guot na sanina aron dili maipit ang kinatawo.

• Limitahan ang aktibidad sa bata

Dasigon nga magpahulay ug matulog ang mga bata nga miagi sa operasyon aron maka-recover kini. Ayaw sab pasagdi nga muapil kini sa mga aktibidad na pisikal aron maayo dayon ang samad niini.

Painumon og daghang tubig

Sa una nga 24 oras, painomon og daghang tubig ang bata nga nagpatuli aron malikayan ang dehydration.

Painomon kini og saktong tambal

Dili kalimtan na painumon ang bata og tambal na gireseta sa doktor. Pipila sa mga pwede ireseta sa doktor para sa impeksyon mao ang RiteMED Cloxacillin. Kung gikalintura ang bata, mamahimo kining painomon og RiteMED Paracetamol. Mamahimong istoryahon sab ang doktor mahitungod sa over-the-counter pain-relief medicines na mamahimong ipainom sa bata.

Dili kita angay mabalaka ug mahadlok na ipaagi ang atong anak sa tuli o circumcision sanglit aduna kini daghang benepisyo sa ilang panglawas. Hinuon, timan-i nga importante ang pag-amping ug pagkonsulta sa lisensyadong doktor para sa maong operasyon.