First aid sa nagasakit na tangkugo

Pagpanakit sa nagkalain-laing parte sa lawas – ang sama ani nga problema posibleng masinati sa adlaw-adlaw sa mga bata o sa mga tigulang. Kasagaran, masinati kini pagkamata pa lang sa buntag. Pinaagi sa mga protein sa cells na ginatawag nga cryptochrome, natural nga ginapugngan sa lawas ang bisan unsang inflammation o paghubag ug kasakit nga ginabati kung kini nakapahulay o natulog. Temporaryong ginapugngan sa lawas ang sakit, maong pagmata, daw murag nagabalik ug mas nagasakit ang body parts nga gipahulay.

Pipila sa mga parte nga sagad makasinati og sakit mao ang likod, mga kaunoran sa bukton ug paa o batiis, mga abaga, ug liog ug tangkugo. Hisgotan nato karon ang mga kondisyon na posibleng hinungdan sa pagpanakit sa tangkugo.
 

Ngano makasinati og sakit na tangkugo?

Ang mga hinungdan sa neck pain o pagpanakit sa tangkugo kay posibleng tungod sa poor posture, injuries, o medical conditions nga nagkinahanglan og atensyon sa usa ka health professional. Hisgotan nato kini isa-isa.

1. Poor posture – Tungod sa grabe nga paggamit og gadgets ug technology sa pagtrabaho, pag eskwela ug bisan sa pagpahulay, dakong kadaot ang maitampo niini sa pagkuha og saktong posture o barog. Dili lang kini nagpasabot sa paglingkod ug pagtindog. Lakip na sab dinhi ang dugay nga pagyukbo samtang nagagamit og mobile phones o ang dili paglihok og dugay samtang nakahigda.
    
2. Injuries – Bisan man dili direktang naigo ang liog sa usa ka aksidente, posible gihapon kining muresulta sa pagsakit sa tangkugo tungod sa impact og trauma tungod sa panghitabo. Tungod kini sa kalit nga pagpaspas ug paghinay nga lihok sa liog sa byahe na dala sa pagkabangga, hinungdan para maapektuhan ang tissues. Ang mga nahiagom nga injury sa abaga, bukton ug upper ug lower back kay possible sab magdala og discomfort sa tangkugo. Kini tungod sa pagkakonektado sa mga muscles ug nerves.
    
3. Muscle strain – Ang sobra nga paggamit sa mga kaunoran ilabi na kada adunay bug-at nga workout o kalit nga paglihok kay hinungdan sab sa nagasakit nga tangkugo. Tungod sa sobra nga pagkagamit ug pagkakapoy sa muscles sa nawong, abaga, ug upper back, posible sab magka-strain sa tangkugo.
    
4. Mga impeksyon – Adunay mga infection nga makaapekto sa cervical spine nga muresulta sa sakit na tangkugo sama sa meningitis. Kini usa ka kondisyon nga makaapekto sa utok ug sa spine. Apil na sab dinhi ang tuberculosis of the spine na usahay makaapekto sab sa liog. Ang mga maong kondisyon nanginahanglan dayon og medical evaluation.
    
5. Pagpanakit sa ulo – Adunay kalabutan ang pagpanakit sa ulo ug sa tangkugo. Ang headaches, ilabi na ang migraine, muresulat sa sakit sa tangkugo, pagsuka, pagkalipong, ug tensyon sa mga muscle.
    
6. Stress – Ang sobra nga stress – apilan pa og kakapoy, kakulangon sa tulog, kagutom, ug dehydration – muresulta sab sa pagsakit sa tangkugo. Ginahimo kining tense ang muscles sa liog hinungdan nga makabati og pagpanakit.
    
7. Medical conditions – Adunay mga seryosong balatian nga nagapasinati og sakit nga tangkugo isip sintomas. Pipila niini ang mga kondisyon sa kasingkasing sama sa hypertension ug high cholesterol. 

Pahinumdom: Sa ingon aning higayon kinahanglan bantayan ang pagpanakit sa ulo ug tangkugo sanglit posibleng senyales na kini sa atake sa kasingkasing o heart attack. Aron mas masabtan ang mga maong kondisyon ug ang first aid na mamahimong buhaton sa oras nga masinati kini, atong sayron ang mga maong sakit.

Unsa ang hypertension?

Ang hypertension ginatawag sab nga high blood pressure. Gikan sa ngalan niini, kusog ang pressure sa dagan sa dugo sa mga ugat. Busa, makadaot kini sa mga ugat ug makaapekto sa normal nga dagan sa kasingkasing. Lakip sa mga komplikasyon niini ang stroke, atake sa kasingkasing ug sakit sa bato.

Ang mga nag-unang hinungdan sa hypertension mao ang pagkonsumo og mga parat ug tambok na pagkaon, pagbisyo, pagka overweight, sedentary lifestyle, stress, kakapoy ug genetics. Apil sa sakit sa tangkugo, ania ang mga sintomas nga kinahanglan bantayan:

• Kanunay nga gikapoy
• Pagpanakit sa ulo
• Pagsakit sa dughan
• Maglisod og ginhawa
• Paghanap o pagngitngit sa pananaw; ug
• Dili regular ang heartbeat

Unsa ang pwedeng buhaton nga first aid sa nagasakit nga tangkugo?

Tungod laainlain ang hinungdan sa nagasakit nga tangkugo, adunay lain-laing pamaagi aron mahatagan kini og remedy. Ania ang pipila sa mga pwedeng buhaton:

1. Ipapahulay. Kung ang pasyente nagasakit ang tangkugo tungod sa stress, muscle strain, headache ug injury, mamahimong ipahulay kini aron mabawasan ang discomfort. Kung wala mabawasan man lang ang sakit sulod sa pipila ka oras hantod duha ka adlaw, mokonsulta sa doktor.
    
2. Mugamit og cold compress. Kung nanghubag ang tangkugo tungod sa muscle strain ug injury, sulayan ang pagbutang og cold compress sulod sa 20 ka minutos upat hantod walo ka beses sa isa ka adlaw.
    
3. Hatagan og tambal. Adunay available na paracetamol o ibuprofen para sa nagasakit nga tangkugo. Pwede kini kung ang hinungdan sa pagpanakit mao ang kakapoy, muscle strain ug poor posture, ug mga injury. Hinumdoman lang nga dili muinom og lampas unom kabuok sa mga maong tambal sulod sa 24 ka oras. Mamahimong sundon sab ang tambag sa doktor kung ugaling walay improvement nga nahitabo sa tangkugo sulod sa 3 ka adlaw.
    
4. I-check ang blood pressure. Para sa mga nagasakit ang tangkugo tungod sa diagnosed (o dili pa) na hypertension, kuhaa usa ang blood pressure. Palingkuron ang pasyente sulod sa 20 ka minuto sabayan og pagrelax samtang nakahigda. Human niini, i-check usab ang blood pressure. Kung adunay ginainom nga maintenance medicine ang pasyente, i-administer kini og dalaon sa pinakaduol nga ospital kung kinahanglan.

Ang mga ginabati nga senyales sa atong lawas sama sa pagpanakit sa mga parte niini kay pamaagi aron mahibaloan nato kung aduna na ba kinahanglan hatagan og atensyon sa atong panglawas. Mahimong hatagan dayon og aksyon ang mga kinahanglan sa atong lawas pinaagi sa pagresponde sa mga pagpanakit nga ginabati. Ang mga nahisgotan nga tips kay first aid lamang. Ginarekomenda gihapon nga mokonsulta sa doktor aron mahatagan og mas angay nga solusyon.