Unsa nga klase sa ubo ang naa ka?

Ang pag ubo usa na nga common na kondisyon na sagad mahitabo adlaw-adlaw. Sukwahi sa popular na nahibaloan, ang ubo dili usa ka sakit. Kini usa ka reaksyon sa lawas kung adunay mga butang na nakabara sa agi-anan sa hangin. Ang pwersa sa hangin na gikan sa pag atsing ang maoy nagapagawas sa mga bara sama sa plema, sipon ug saag nga pagkaon.

Daghang klase sa ubo ang posibleng mahitabo sa tao. Adunay dili delikado ug aduna sab mahimong senyales o sintomas sa mas grabe na sakit. Atong hisgutan kini.

Productive cough

Ang productive cough adunay plema ug sipon na gikan sa agi-anan sa gininhawa, sulod sa ilong, sinuses o sa baga. Dili man komportable ang pag atsing nga dala niini, ang productive cough kinahanglan sa lawas aron mapagawas ang mga bara. Lakip sa mga hinungdan sa maong ubo mao ang mga viral illness, impeksyon sa baga ug agi-anan sa hangin, sobra ug padayon nga pagpanigarilyo, ug chronic obstructive pulmonary disease.

Kung aduna kay productive cough, magdala og panyo nga pangpahid sa mucus. Igawas sab ang plema sa lababo o toilet, dili sa dalan tungod posibleng makatakod nga sakit ang hinungdan sa imong ubo. Muinom og tambal aron paspas ang pag-ayo sa sakit nga hinungdan sa imong ubo.

Kung grabe ang ubo ug daw wala kini kaayohan, magpatanaw dayon sa doktor. Posibleng aduna na kay seryoso nga sakit.

Non-productive cough

Ang non-productive cough o dry cough walay sipon ug plema. Mahitabo kini kung ikaw adunay saag nga pagkaon sa agi-anan sa hangin, nakaginahawa og abog, baho nga kemikal, o tungod sa allergy. Posible sab mahimong resulta ang maong ubo sa viral illness, hubak ug acid reflux.

Kung ang hinungdan niini mao ang simple nga bara o simple nga iritasyon, mawala ra kini og iyaha. Apan sa lain nga kaso, mas nindot kung adunay pirmi nga baon na tambal sa ubo.

Acute Cough

Ang acute cough mao ang ubo na mawala sulod sa 3 ka semana. Ang mga sagad nga hinungdan niini mao ang simple nga kondisyon sama sa sipon, allergy ug bara sa agi-anan sa hangin, apan posible sab kini mahimong chest cough na dala sa pulmonya, o sintomas sa mga pagbati sama sa trangkaso, whooping cough, ug uban pang klase sa respiratory infection.

Subacute Cough

Ang subacute cough magpabilin bisan wala na ang respiratory infection o sipon. Sagad nga magdugay ang ubo sulod sa 3 hangtod 8 ka semana ug ang mga sagad na hinungdan niini mao ang postinfectious cough, bacteria, virus ug hubak. Kung grabe ang impeksyon, kinahanglang muadto sa ospital aron mahatagan og sakto nga tambal sa sakit.

Chronic Cough

Ginatawag nga chronic cough ang klase sa ubo nga padayon nga nagabalik o nagadugay og lampas sa 8 ka semana. Posible sab kining sintomas sa allergies, ilabi na kung pirmi exposed sa mga allergen o hinungdan sa imong allergy. Apan, pwede sab nga resulta ang chest cough sa mga seryoso nga sakit sama sa bronchitis, hubak o epekto sa pagpanigarilyo (smoker’s cough).

Tungod ang ubo usa ka reaksyon sa lawas, ug dili sakit, dapat mahatagan og solusyon ang hinungdan niini. Ang simple nga sipon mamahimong mapaayo sa tambal sa ubo ug ang simple nga allergy mahimo sab mapaayo sa antihistamine. Apan, para sa mas grabe nga kaso sa ubo, kritikal ang pagkonsulta sa doktor. Maayo nga mahibalan dayon ang hinungdan sa grabe nga ubo bago pa musamot ang sakit o impeksyon na hinungdan niini.